संकल्प मिडिया सेन्टरद्वारा संचालित

बजेटको समस्याले रोकियो विक्की र साराको ‘द इमोर्टल अश्वत्थामा’

  •   काठमाडौं
  •   ४ भाद्र २०७८, शुक्रबार
  •   एजेन्सी

बलिउड अभिनेता विक्की कौशल र अभिनेत्री सारा अली खान पछिल्लो कयौँ दिनदेखि नयाँ चलचित्र ‘द इमोर्टल अश्वत्थामा’ लाई लिएर चर्चामा छन् । ‘ऊरी’ चलचित्रका निर्देशक आदित्य धरको निर्देशनमा बन्न लागेको यो चलचित्र महाभारतका चरित्र अश्वत्थामामा आधारमा बनाउने तयारी गरिएको थियो । चलचित्रको सुटिङ यही महिनाबाट सुरु हुने भनिएको थियो । तर, अहिले निर्माताहरुले चलचित्रलाई रोक्ने फैसला गरेका छन् । यसपछाडि बजेटको अभाव मुख्य कारण रहेको बताइएको छ ।

भारतीय सञ्चारमाध्यमका अनुसार चलचित्रको बजेटमा समस्या आएपछि निर्माणलाई पछि धकेलिएको हो । यसअघि पनि विभिन्न कारणले चलचित्रको मिति सर्दै आएको थियो । द इमोर्टल अश्वत्थामा पछिल्लो समय बनिरहेको बलिउडको सबैभन्दा महँगो चलचित्रहरू मध्ये एक थियो । यस चलचित्रमा बलिउडका दिग्गज कलाकारहरूलाई समावेश गर्ने तयारी भइरहेको थियो । चलचित्रको एक मुख्य भूमिकामा अनुबन्ध गर्न निर्देशक धारले सुनिल शेट्टीसँगको कुराकानी अन्तिम चरणमा पुर्‍याएका थिए ।

यो चलचित्रलाई भारत, आइसल्यान्ड र यूएईमा सुटिङ गर्ने तयारी गरिएको थियो । निर्माताहरुले अगस्तमा चलचित्रको सुरुवात गर्न चाहेका थिए तर कोभिड–१९ को दोस्रो लहरका कारण यो स्थगित भएको थियो । त्यसपछि सेप्टेम्बरमा चलचित्र सुरुवात गर्ने बताइएको थियो । तर, अहिले सो समयमा पनि चलचित्र सुरु नहुने भनिएको छ ।