संकल्प मिडिया सेन्टरद्वारा संचालित

हिरासतमा मृत्यु भएपछि उपेन्द्र यादवविरुद्ध आन्दोलन गर्न जेपी गुप्ताको आह्वान

  •  
  •   १६ भाद्र २०७५, शनिबार
  •  

काठमाडौं । बर्दियाको प्रहरी हिरासतमा मृत्यु भएका राममनोहर यादवको बारेमा चौतर्फी विरोध भएको छ । हिरासतमा रहेका यादव अचानक बिरामी भएको भन्दै उनलाई उपचारका लागि काठमाडौं ल्याउने क्रममा बाटैमा मृत्यु भएको थियो ।
यादवको मृत्यु बिमारीले होइन, प्रहरीको यातनाले मृत्यु भएको दावी गरिएको छ । मधेशी नागरिक समाज तथा बुद्धिजिवीले यादवको मृत्युको स्मरणमा मैतिघर मण्डलामा आयोजना गरिएको श्रद्धाञ्जली कार्यक्रममा बोल्ने वक्ताहरुले हिरासतमा प्रहरीले यातना दिएर हत्या गरेको र छानबिन हुनुपर्ने माग गरेको छ ।
राजनीतिक विश्लेषक सिके लालले मधेशीमाथि राज्यको दमन बढ्दै गएको यसलाई पछिल्लो उदाहरणको रुपमा लिनुपर्ने बताए । कसैलाई कालो झण्डा देखाउँदैमा थुनेर राख्न पाइदैँन, थुनेर राखेपछि त्यसलाई यातना दिन पाइदैँन तर प्रहरीकै हिरासतमा रहेका यादवको मृत्यु हुनु शंकास्पद रहेको उनले बताए ।
उनले भने, ‘राज्यले यसको जवाफ दिनुपर्छ । वाक स्वतन्त्रताको हनन राज्यले गरेको छ । यसको न्यायिक छानबिन हुनुपर्छ ।’ अन्य वक्ताहरुले पनि प्रहरी हिरासतमा राममनोहर यादवको हत्या भएको दावी गरे ।
भदौ ७ गते बर्दियाको जिल्ला विकास समितिमा उपप्रधान एवं स्वास्थ्यमन्त्री उपेन्द्र यादवको उपस्थितिमा संघीय समाजवादी फोरम नेपालले आयोजना गरेको कार्यक्रममा झण्डा देखाउने क्रममा यादवसहित चारजना पक्राउ परेका थिए ।
पक्राउ परेपछि उनीहरुको स्वास्थ्य जाँच पनि भएको थियो । तर, त्यतिबेलाको जाँचले कुनै खराबी देखिएको थिएन । उनीहरुलाई बर्दिया जिल्ला प्रहरी कार्यालयमा राखेको थियो ।
भदौ १३ गते अचानक चारजना मध्ये राममनोहर यादवको हातखुट्टा नचलेपछि उनलाई उपचारका लागि गुलरिया अस्पतालमा भर्ना गरिएको थियो तर त्यहाँ उपचार सम्भव नभएपछि थप उपचारका लागि त्यसको भोलिपल्ट भेरी अञ्चल अस्पतालमा लगिएको थियो ।
त्यहाँ पनि उपचार सम्भव नभएपछि नेपालगञ्ज नर्सिङ होममा लगिएको थियो । त्यहाँ पनि सम्भव नभएपछि एम्बुलेन्सबाट काठमाडौं ल्याउने क्रममा उनको मृत्यु भएको बताइएको छ ।