संकल्प मिडिया सेन्टरद्वारा संचालित

आईसीसी विश्वकप : आजको खेलमा प्रभाव पार्न सक्ने खेलाडी

  •  
  •   २५ जेष्ठ २०७६, शनिबार
  •  

एजेन्सी/इङ्ल्यान्ड
मोइन अली इङ्ल्यान्डका अनुभवी अलराउन्डर खेलाडी हुन् । तीनवटै ढाँचाको क्रिकेटमा उनको उत्तिकै दक्खल छ । उनको उत्कृष्ट प्रदर्शनका कारण इङ्ल्यान्डले थुप्रै प्रतियोगितामा सफलता पनि हात पारेको छ । ३२औं वर्ष प्रवेशको संघारमा रहेका मोइन अलीले इङ्ल्यान्डका लागि ९८ एकदिवसीय प्रतियोगिताको ७९ पालीमा २५.५६ को औसतले कुल एक हजार सात सय १३ रन बनाएका छन् । एकदिवसीय प्रतियोगितामा ब्याटिङतर्फ उनको उत्कृष्ट प्रदर्शन एक सय २८ रन हो । एकदिवसीय प्रतियोगितामा बलिङतर्फ पनि उनले ९२ पालीमा कुल ८३ विकेट लिइसकेका छन् ।
बलिङतर्फ उनको उत्कृष्ट प्रदर्शन ४६ रन दिएर चार विकेट हो । एकदिवसीय क्रिकेटमा उनले ३१ वटा क्याच पनि लिएका छन् । जारी विश्वकपमा पाकिस्तानविरुद्घको खेलमा पनि उनले तीन विकेट लिएका थिए । त्यसअघि दक्षिण अफ्रिकाविरुद्घको खेलमा पनि एक विकेट हात पारेका थिए । ब्याटिङतर्फ भने जारी विश्वकपको दुवै खेलमा उनी चल्न सकेका छैनन् । बंगलादेशविरुद्घको खेलमा उनलाई प्रभाव पार्न सक्ने खेलाडीका रूपमा हेरिएको छ ।
मुसफिकर रहिम (बंगलादेश)
बंगलादेशी टोलीका प्रभावशाली ब्याट्सम्यान हुन्, मुसफिकर रहिम । उनले अन्तर्राष्ट्रिय क्रिकेटमा बंगलादेशी टोलीलाई थुप्रै महत्वपूर्ण सफलता दिलाएका छन् । उनी टोलीका विकेटकिपर पनि हुन् । दुई दिनपछि ३२औं जन्मदिन मनाउने तयारीमा रहेका मुसफिकर रहिम जारी विश्वकपमा पनि लयमा देखिएका छन् । उनले जारी विश्वकपको दक्षिण अफ्रिकाविरुद्घको खेलमा ८० बलको सामना गरी आठ चौकाको मद्दतले ७८ रनको योगदान दिएका थिए । सो खेलमा बंगलादेश २१ रनले विजयी भएको थियो ।
न्युजिल्यान्डविरुद्घको खेलमा भने उनी १९ रन बनाउँदै रनआउट भएका थिए । अनुभवी खेलाडी मुसफिकर रहिमले बंगलादेशका लागि दुई सय सात एकदिवसीय क्रिकेटको एक सय ९३ पालीमा ३५.१२ को औसतले कुल पाँच हजार ६ सय ५५ रन बनाएका छन् । एकदिवसीय क्रिकेटमा उनको उत्कृष्ट प्रदर्शन एक सय ४४ रन हो । एकदिवसीय क्रिकेटमा उनले हालसम्म एक सय ७१ क्याच लिएका छन् भने ४२ ब्याट्सम्यानलाई स्टम्पिङ गरेका छन् । उनीबाट इङ्ल्यान्डविरुद्घको खेलमा पनि उत्कृष्ट प्रदर्शनको आशा गरिएको छ ।